Die misleiding van die gees van godsdienstigheid.

Transcription

1 Die misleiding van die gees van godsdienstigheid. Teks: Johannes 9:4, 5 en 39. So lank as dit nog dag is, moet ons die werk doen van Hom wat My gestuur het; die nag kom wanneer niemand kan werk nie. Terwyl Ek in die wêreld is, is Ek die lig vir die wêreld. (verse 4 en 5) "Ek het na hierdie wêreld toe gekom met die oog op 'n beslissing, sodat dié wat nie sien nie kan sien, en dié wat sien, kan blind word. (vers 39) Johannes 8 eindig daarmee dat Jesus, na 'n konfrontasie met die Jode, van die tempel af weggejaag word. God se Seun is nie welkom in God se huis nie. Hy moet padgee. "Terwyl Jesus wegstap - só begin Johannes hoofstuk 9. Lees verse 1-12 en Terwyl Jesus wegstap van die tempel af waar Hy nie meer welkom is nie, kom Hy die blinde man teë wat aan Hom die geleentheid bied om die werk te doen van die Vader wat Hom gestuur het. Dít is die rede, sê Hy, waarom hierdie man blind was: dit was nie omdat hy gesondig het nie; en ook nie vanweë bepaalde sondes van sy ouers nie; maar hy was blind sodat die werke wat God doen, in sy lewe sigbaar sou word. Hy was blind sodat dit gesien sou word dat God mense gesond maak, dat Hy mense vry maak, dat Hy hulle weer herstel. Dit is waarmee God in hierdie wêreld besig is omdat dit tot sy eer strek. Dis waarvoor Hy sy Seun hierheen gestuur het. En dit is ook waartoe die Seun mense wat in Hom glo, die wêreld instuur. Daarom sê Hy vir sy dissipels: "ons moet die werk doen van Hom wat My gestuur het". "Ons"...nie "Ek nie, maar julle saam met My. En ons moet dit nou doen nou, solank as dit nog dag is. Nou, terwyl daar nog geleentheid is daarvoor. Dis waarmee ons as kerk ons moet besig hou in opdrag van die Here self, met die gesag waarmee Hy ons beklee, en in die krag van sy Gees. Só moet ons die Here dien terwyl die geleentheid nog daar is. En daarvoor moet ons uitgaan na die mense toe daar waar hulle blind is, daar waar hulle siek is... ook met die MI-virus besmet is; daar waar hulle honger is, daar waar hulle sonder 'n huis is omdat hulle nie werk het nie, daar waar hulle verward is omdat hulle mislei word; daar waar hulle verlore is. Dáár,...daar buite voer ons die opdrag van die Here uit. Nie hier in die kerkgebou nie; nie hier in die erediens nie.

2 Natuurlik is dit nie verkeerd om hier in die erediens saam te kom nie. Trouens dit is óók nodig. Maar hier kom ons saam om die Here wat ons verlos het, te loof en te prys te aanbid. Hier kom ons saam om na die Woord te luister - sodat ons sal verstaan wat die opdrag is waarmee Hy ons uitstuur om sy werk te gaan doen. Hier kom ons saam om toegerus te word vir die taak wat ons moet gaan verrig. Hier ontvang ons die motivering daartoe. Hier word ons batterye gelaai met die oog daarop om te kan uitgaan. Want die werke wat God doen, gebeur nie soseer in die erediens nie. Dit gebeur nie in die tempel nie. As die Jode vir Jesus met klippe van die tempel af wegjaag, dan gaan doen Hy die werke van dié Een wat Hom gestuur het. Omdat dit sy opdrag is. En daarom gaan doen ons dit ook vandag omdat dit ook óns opdrag is. En ons gaan doen dit ongeag hoe mense daarop reageer. Want ja, as ons vandag die werke van God doen, dan moet ons weet dat ons dieselfde reaksie daarop sal kry as wat Jesus gekry het... en wat Johannes hier, in die geval van hierdie blinde man, beskryf. Ons moet dieselfde reaksie verwag. Daar was die bure gewees, en die mense wat hom geken het. Sommige was verbaas gewees oor sy genesing... ander was skepties daaroor: "Hy lyk maar net soos daardie man." Daar was sy ouers, wat bevestig het dat dit hulle seun is, en dat hy blind was... maar hoe dit gebeur het, en wie dit gedoen het dit moet hyself maar vertel. Want hulle was bang dat hulle uit die sinagoge geban sou word. En dan was daar ook die Fariseërs wat onder mekaar verdeeld was: Jesus kan nie van God af kom nie, want dan sou Hy nie die sabbatsgebod oortree het nie. Maar aan die ander kant: hoe kan iemand sonder die krag van God 'n blinde genees... te meer nog aangesien hierdie man reeds van sy geboorte af nie kon sien nie? Hulle steek vas in ongeloof, want hulle wil nie aanvaar dat Jesus die blinde man se gesig herstel het nie Tragies soos dit is! Want hulle is die mense wat van beter moes geweet het. Hulle het dan binne die Joodse tradisie met sy Messiasverwagting geleef. Hulle is onderrig in die wet wat van die Messias getuig het. Hulle het die profete geken o.a. vir Jesaja wat geprofeteer het (in 35:5 en 6): "God kom julle red!' Blindes sal kan sien, dowes sal kan hoor, lammes sal kan rondspring soos takbokke, stommes sal kan sing. Hulle het die tempel besoek, ook daaroor gewaak ook dié dag die verwaande ketter met klippe van die tempel af weggejaag, soos wat 'n mens 'n hond wegjaag.

3 En hoekom? Omdat dit wat Hy gesê het en wat Hy gedoen het, nie ingepas het in húlle prentjie van hoe die Messias sou optree nie. Jesus het nie aan hulle godsdienstige verwagtinge voldoen nie. Hier het ons n voorbeeld van 'n hele groep mense wat die slagoffers geword het van wat 'n "gees van godsdienstigheid genoem kan word. Die gees van godsdienstigheid verlei mense om aan God iets aan te bied om die ewige lewe te verkry. Goeie werke, mooi tradisies, regte kerk-taal alles dinge om goeie krediet op te bou by die Here. Maar dit maak ons blind vir dit wat ons moet afstaan. Afstaan om van dié gees ontslae te raak. Dít wat in die pad staan van n persoonlike verhouding met die Here. Die gees van godsdienstigheid is uit die aard van die saak 'n bose gees...en waarskynlik ook nie net één nie, maar 'n hele magdom geeste wat saamspan om hulle doel te bereik. En daardie doel is om godsdienstige mense te verhinder om n persoonlike verhouding met die Here te hê. Sulke mense kan dus baie bedrywig wees met allerlei godsdienstige aktiwiteite - maar sonder om die krag van die Heilige Gees in hulle lewe te ervaar, of selfs te ken. Hierdie gees van godsdienstigheid werk in die lewe van enkelinge..., geïsoleerd, maar hy slaag soms ook daarin om 'n hele groep mense onder sy invloed of in sy mag te kry. Soos wat dit met die Fariseërs gebeur het. En daarom kom ons dit nie net in Johannes 9 nie, maar ons kom dit telkemale in die Evangelies teë dat Jesus omdat sý lewe deur die Gees van God beheer is met die Fariseërs gebots het. Hierdie herhalende konflik bied vir ons goeie insig in hoe die gees van godsdienstigheid te werk gaan. n Belangrike strategie wat hierdie gees dikwels volg, is om alles denkbaar te doen om 'n kragtige geestelike lewe in gelowiges teen te staan. En hy kry dit veral reg wanneer hy ons verhoed om te verstaan wat God sê, en ook wat Hy doen. Hoe kry hy dit reg? 1) Hy behaal elke keer sukses wanneer ons 'n besluit neem waarby ons meer op ons intellek staatmaak as wat ons die leiding van die Here se Gees soek, en ook vertrou. Die Woord sê vir ons in Psalm 37:5; Laat jou lewe aan die Here oor en vertrou op Hóm; Hy sal sorg". Maar in plaas daarvan om by die Here die antwoord te soek, vertrou ons eerder ons gesonde verstand om die regte oplossing te vind. 2) Die gees van godsdienstigheid laat ons baie maklik in wettisisme verval sodat ons dan 'n slaaf van 'n morele kode word. En ons kom nie eens agter nie dat die letter doodmaak, terwyl die Gees lewend maak. (2 Korintiërs 3:6)

4 3) Die gees van godsdienstigheid het sy sin gekry elke keer wanneer ons die Here nie in Gees en waarheid aanbid nie (Joh. 4:23 en 24), maar dit volgens 'n formule doen, of doen volgens voorgeskrewe rituele en gewoontes. 4) Die gees van godsdienstigheid behaal sukses in die mate wat ons die waarheid verdraai, of wat ons selfs blind word daarvoor. Daar kans dink aan wat ons in 1 Timoteus 4:1 lees: "Die Gees sê uitdruklik dat in die eindtyd sommige afvallig sal word van die geloof. Hulle sal misleidende geeste navolg en die leerstellings van bose geeste aanhang ". En hulle gaan so listig te werk. Dink maar net aan die Satan se aanhalings uit die Skrif toe hy Jesus in die woestyn versoek het. Op die oog af' klink dit nogal oortuigend, maar Jesus ontmasker hom elke keer deur daarop te wys dat hy die Skrif verkeerd gebruik. (Luk. 4: 1 13) Nou, op dieselfde manier, saai sy trawante, sy handlangers vandag ook nog baie verwarring. 5) Dis die gees van godsdienstigheid wat ons verlei om met ons verstand te bid, al sê die Woord in (Efesiërs 6:18, Ou Vert) ons moet "met alle gebed en smeking by elke geleentheid bid in die Gees " Wanneer ons in die vlees bid, is die vorm en die struktuur van ons gebed vir ons belangriker as wat ons bid. Só 'n gebed is formeel... sonder lewe en ook sonder krag. 6) Onder die invloed van die gees van godsdienstigheid skinder ons, en praat ons kwaad van, en diskrediteer ons mense wat deur die Gees wandel (Galasiërs 5:25) net soos wat die Fariseërs ook vir Jesus aangeval het, Hom verdag gemaak het, en Hom uiteindelik laat dood maak het. 7) Kerkmense word ook soms daarvan beskuldig dat ons skynheilig is... en dan is ons nie altyd onskuldig nie. Want soms slaag die gees van godsdienstigheid daarin om ons so ver te kry. Wie het nog nooit gesê dat dít die waarheid is terwyl hy/sy self nie daarvolgens optree nie? Jesus het in Mat 23:25 sulke godsdienstige leiers aan die kaak gestel met: Ellende wag vir julle, Skrifgeleerdes en Fariseërs, huigelaars! Julle maak die buitekant van die beker en die skottel skoon, maar binne is julle vol hebsug en onmatigheid. 8) Vir mense wat in die greep van die gees van godsdienstigheid vasgevang sit, is dit onmoontlik om die werk van die Heilige Gees te onderskei. Die Fariseërs het byvoorbeeld vir Jesus in Mat 12:24 daarvan beskuldig dat Hy bose geeste uitdryf met behulp van Beëlsebul, die aanvoerder van die bose geeste. Só absurd kan die misleiding wees, omdat hierdie aanklaers die Heilige Gees nie ken nie. Om dus saam te vat: Die gees van godsdienstigheid is 'n demoon wat God se verlossende, bevrydende werk in mense se lewens teenstaan. Hy doen dit deur ons te verlei om goeie

5 mense te wees, wat goeie werke doen... maar sonder om n verhouding met die Here te hê, en sonder om die krag van sy Gees te ken. Dit is al oud: 500 jaar gelede het Maarten Luther protes aangeteken oor die kerk se leer dat ek my saligheid moet verdien deur godsdienstigheid. En daarom is die volgende stelling deur n predikant waar, nl. dat "the spirit of religion is the meanest, foulest, most ruthless spirit you will ever confront - As an experienced pastor I can tell you this without equivocation." Nou dit is die slegte nuus. Maar die goeie nuus is dat hierdie gees nie naastenby soveel krag het nie as God se liefde vir ons... en dat hy ook nie naastenby soveel krag het nie as God se begeerte om 'n intieme verhouding met elkeen van ons te hê. Ons Vader wil hê dat ons almal die wonder... en die weelde sal geniet van 'n lewe wat deurdrenk is van die Heilige Gees. En as ons dit in opregtheid soek, dan sal Hy ons oë oopmaak vir elke aanslag van die gees van godsdienstigheid op ons lewe... en Hy sal ook vir ons die krag gee om dit te weerstaan... en ons sal geskik wees om die werk van God te doen solank as dit nog dag is tot sy eer! Daar was nog n reaksie op Jesus se werk daardie dag, nl dié van die man wat genees is. Sy reaksie was eenvoudig, kinderlik, onvoorwaardelik, gelowig: Ek glo, Here! En hy het Hom aanbid. Dis wat Jesus doen: As Hy ons pad kruis, dan stel Hy ons voor 'n beslissing, voor 'n keuse: Dié wat sien, word blind. En dié wat nie sien nie, kan sien! Wat kies jy? Ds PA Venter Linden

6 Liturgie Vooraf: Ps 33-1: 1 Votum: Lied 169: 1, 2, 3 Seëngroet Lofsang: Lied 476: 1; Ps 46-2: 2 Geloofsbelydenis volgens Nicea Gebed Lied 442: 1, 2 Skriflesing: Johannes 9: 1 12 en Teks: Joh 9: 4, 5, 39. Preek van Ds PA Venter Die misleiding van die gees van godsdienstigheid. Lied 274: 1, 2 en Lied 276: 1, 2 as gebed. Verootmoediging: lees lied 438. Lied 275: 3, 5 Liefdesdiens Wegstuur seën Amen met Ps 106-1: 20.