MET ADDISON BEVERE Ontmoet die Heilige Gees.indd /12/15 1:22:34 PM

Transcription

1

2 MET ADDISON BEVERE

3 ONTMOET DIE HEILIGE GEES Oorspronklik in die VSA uitgegee as The Holy spirit: An Introduction deur Messenger International, Posbus 888, Palmer Lake, in Vertaal met toestemming. Eerste Afrikaanse uitgawe in 2017 deur Struik Christian Media n Druknaam van Struik Christian Media (Edms) Bpk Posbus 3434 Tygervallei 7536 Reg.nr. 2013/157123/07 Teks John P. Bevere, 2013, 2014 Tensy anders aangedui, is alle Bybelaanhalings geneem uit Die Nuwe Lewende Vertaling 2006, Christelike Uitgewersmaatskappy. Ander vertalings wat gebruik is, Die Boodskap 2002, Christelike Uitgewersmaatskappy; Die Bybel in Afrikaans (1953-vertaling, 1983-vertaling en Die Bybel vir Almal) Die Bybelgenootskap van Suid-Afrika. Gebruik met toestemming. Alle regte voorbehou. Geen gedeelte van hierdie publikasie mag gereproduseer, in n ontsluitingstelsel bewaar of weergegee word, in enige vorm of op enige manier, hetsy elektronies of meganies, deur fotokopiëring, die maak van opnames of andersins, sonder die skriftelike toestemming van die kopiereghouers nie. Projekbestuur deur Reinata Thirion Vertaal deur Helga Steyn Geredigeer deur Helen Senekal DTP deur Monique Bijker Omslagontwerp deur Sonja Louw Omslagfoto van Shutterstock Gedruk en gebind in China ISBN To order this book:

4 INHOUD Oor hierdie interaktiewe boek...vii Inleiding...ix 1. Wie is die Heilige Gees? Die persoonlikheid van die Heilige Gees Drie verhoudingsvlakke Deur die Gees bemagtig Die taal van die Gees Bonus-hoofstuk: Vraag-en-antwoordsessie Bylaag: Hoe om verlos te word Eindnotas...225

5 1 WIE IS DIE HEILIGE GEES? Wanneer die Raadgewer, die Heilige Gees, kom wat die Vader in my Naam sal stuur, sal Hy julle in alle opsigte onderrig en julle ook herinner aan alles wat Ek vir julle gesê het. JOHANNES 14:26 DAG 1 D it was n Oujaarsaand. Ek het n begeerte gehad om te vas en te bid, en vra toe vir die Here, Watter Bybelboek moet ek lees? Tot my verbasing hoor ek, Die boek Handelinge. Waarom was ek verbaas? Want met my vorige lang vastyd en gebed het ek presies dieselfde opdrag gehad: Lees die boek Handelinge. Wat met my vorige vastyd in Handelinge uitgestaan het, was n konflik tussen voorneme en rigting in die apostel Paulus se lewe, en die swaarkry wat daarop gevolg het. Laat my toe om te verduidelik: God het Paulus gekies om die evangelie aan die heidene te verkondig. Hy het gesê, En God het my gekies om n prediker te wees, n apostel en n leermeester van dié Nuus (2 Tim. 1:11). Dit is n opdrag met n spesifieke doel. Hy het hierdie opdrag verskeie kere in sy lewe herhaal. Aan die begin van sy eerste sendingsreis het hy vir die Jode gesê, Ons gaan nou die goeie nuus meedeel aan mense wat nie Jode is nie. God 1

6 2 ONTMOET DIE HEILIGE GEES het ons beveel om na hulle toe te gaan toe Hy vir ons gesê het: Ek het jou aangestel om n lig vir ander volke te wees (Hand. 13:46 47, Die Boodskap). Met sy tweede reis het hy reguit gesê, Van nou af spits ek my toe op die nie-jode (Hand. 18:6). Vir die Romeine het hy geskryf, Ek is immers deur God aangestel as n apostel om die goeie nuus aan mense buite Israel te vertel (Rom. 11:13, Die Boodskap). Hierdie stellings kom in al sy geskrifte voor. Maar weens sy liefde en die begeerte om sy Joodse volksgenote te red, het hy herhaaldelik na die sinagoges in amper elke stad wat hy besoek het, gegaan. Hy het altyd eers na die Jode gegaan voordat hy probeer het om die nie-jode te nader. Om die waarheid te sê, was dit dikwels die Jode se verwerping van sy boodskap wat hom na die nie- Jode gedryf het. Die Jode was inderdaad die grootste oorsaak van Paulus se ergste vervolging en probleme. Hulle het die volk in oproer gebring en onmin tussen die apostel en die nie-joodse leiers gesaai. Hulle planne om n tweespalt te veroorsaak was die rede vir die meeste van die opstande, inhegtenisnemings, slae en beproewings wat Paulus ervaar het. Dit is belangrik om te onthou dat die Here die Jode baie liefhet. Dit is waarom Jakobus, Petrus en Johannes na hulle gestuur was: Jakobus en Petrus en Johannes hulle is as die sleutelfigure beskou [sou] na die Jode [gaan] (Gal. 2:9). Die boodskap wat tydens my vorige vastyd aan my geopenbaar is, was duidelik: My seun, bly binne die kring van genade waarin Ek jou geroep het om te leef. Moenie toelaat dat jou natuurlike gevoelens of liefde jou van hierdie Goddelike opdrag vir jou lewe laat afwyk nie. Omdat ek hierdie ontmoeting so duidelik onthou het, was dit vir my verbasend dat God my gevra het om weer deur Handelinge te lees. Daar is per slot van rekening vyf-en-sestig ander boeke om van te kies! Ek is so bly ek was gehoorsaam, want toe ek hierdie keer deur Handelinge reis, het iets heeltemal anders vir my uitgestaan (wat wys dat die Woord van God waarlik lewe). Wat hierdie keer my aandag getrek het, was hoe dikwels die leiers en lede van die vroeë Kerk hulle

7 Wie is die Heilige Gees? 3 tot die Heilige Gees gewend het, met Hom in kontak was, op Hom vertrou het en van Hom gepraat het. Hy was n noodsaaklike deel van hulle lewens en by alles betrokke wat hulle gedoen het. Hy was vooraan hulle uitreikbedienings, spanbyeenkomste en strategievergaderings, en Hy was altyd by hulle aktiwiteite betrokke. Hier volg voor beelde van die stellings wat vir my uitgestaan het: Hoekom het jy jou deur die Satan laat omhaal om vir die Heilige Gees te lieg? (Hand. 5:3, 1983-vertaling). Waarom het julle twee saamgesweer om die Gees van die Here te toets? (Hand. 5:9). Óns is getuies hiervan, ons en die Heilige Gees (Hand. 5:32). Moet julle alewig die Heilige Gees weerstaan? (Hand. 7:51). Die Gees het vir my gesê dat ek saam met hulle moet gaan (Hand. 11:12). Een van hulle is deur die Gees gelei om te voorspel dat n groot hongersnood die hele Romeinse wêreld gaan tref (Hand. 11:28). Deur die Heilige Gees uitgestuur (Hand. 13:4). Die Heilige Gees en ons het besluit (Hand. 15:28). Die Heilige Gees het vir Paulus en sy vriende gekeer sodat hulle nie die boodskap in die provinsie Asië kon bring nie (Hand. 16:6, Die Bybel vir almal ). Hulle [het] Bitinië toe probeer gaan, maar die Gees van Jesus het hulle nie toegelaat nie (Hand. 16:7). Paulus [het] al sy aandag bestee aan die prediking om die Jode te oortuig (Hand. 18:5). Het julle die Heilige Gees ontvang toe julle begin glo het? (Hand. 19:2). Hierna het Paulus, deur die Gees gedring, besluit om deur Masedonië en Agaje na Jerusalem te reis (Hand. 19:21).

8 4 ONTMOET DIE HEILIGE GEES Wat ek wel weet, is dat die Heilige Gees my in elke stad verseker (Hand. 20:23). Pas julleself op en die hele kudde oor wie die Heilige Gees julle as ouderlinge aangestel het (Hand. 20:28). Sulke woorde het my keer op keer opgeval. Wat so duidelik soos dag lig geword het, is die werklikheid dat ons nie vandag meer hierdie patroon in die Kerk sien nie. Wat algemeen was onder die gelowiges in Handelinge, is vandag uiters skaars. Ek praat nie net van hierdie gebrek in ander se lewens nie, maar die gebrek daarvan in my eie lewe. Terwyl ek gelees het, het ek besef dat ek my onttrek het aan die genot, nastreef en afhanklikheid van die leierskap, kameraadskap, interaksie en sterk invloed van die Gees van God. Hoe kon ek dit nie met julle deel noudat dit vir my so duidelik geword het nie? Vooraf-stellings Laat my toe om vooraf n paar stellings te maak wat duideliker sal word namate ons dieper op hierdie belangrike bespreking ingaan: Eerstens is daar feitlik nie n Christelike lewe sonder die Heilige Gees nie. Sonder die Heilige Gees is die Christendom droog, eentonig en banaal. Sonder die Heilige Gees is ons werk uitputtend en vermoeiend. Sonder die Heilige Gees is daar geen gemeenskap met God nie. Neem die Heilige Gees uit n kerk en een van twee dinge sal gebeur:

9 Wie is die Heilige Gees? 5 Dit sal in n sosiale klub verander. Dit sal n godsdienstige instelling word. Die waarheid is Sonder die Heilige Gees is daar geen openbaring nie. Sonder die Gees word die Skrif inderdaad dodelik, want daar staan, Die letter maak dood, maar die Gees maak lewend (2 Kor. 3:6). Daar is geen visie sonder die Heilige Gees nie. Daar is geen vreugde sonder Hom nie. Daar is geen vrede sonder Hom nie. Daar is geen vryheid sonder die Heilige Gees nie. Die Here is die Gees, en oral waar die Gees van die Here aan die werk is, word mense regtig vrygemaak (2 Kor. 3:17, Die Boodskap). Kyk na die woorde, oral waar die Gees van die Here aan die werk is. Kom ons deurdink dit. God se Gees is alomteenwoordig Hy is ten alle tye oral. Dawid sê, Waarheen sou ek kon gaan om u Gees te ontwyk? Of waarheen sou ek kon uitwyk om u teenwoordigheid te ontvlug? (Ps. 139:7). Die antwoord is onomwonde, nêrens nie. Dawid skryf verder, Gaan ek op na die hemel toe, is U daar; gaan lê ek in die doderyk, dan is U ook daar! Vlieg ek met die daeraad na die ooste, of gaan woon ek in die verre weste, selfs daar sal u hand my lei, en u regterhand my ondersteun (Ps. 139:8 10). Dit is klinkklaar, Hy is ten alle tye oral. Die volgende vraag wat ons dan moet vra, is, Is daar oral vryheid? Kyk weer na Paulus se woorde: Oral waar die Gees van die Here aan die werk is, word mense regtig vrygemaak. Ons het bewys dat Hy oral is; so ek vra weer, is daar oral vryheid? Die ant woord hierop is n besliste nee. Daar is nie vryheid in bordele, kroeë,

10 6 ONTMOET DIE HEILIGE GEES gevangenisse en hospitale nie. Ek was al in woonbuurte, skole, huise en selfs kerke waar daar nie vryheid is nie. Wat probeer die Skrif dan hier vir ons te sê? Ek wil voorstel dat die volgende n meer akkurate vertaling sou wees: Oral waar die Gees Here is, word mense regtig vrygemaak. 2 Korintiërs 3:17, skrywer se parafrase Die Griekse woord Here is Kyrios. Dit word gedefinieer as hoogste gesag.¹ Die Heilige Gees word nie toegelaat om in die meeste kroeë, gevangenisse, hospitale of huise en selfs in baie kerke gesag uit te oefen nie. Waar Hy as die hoogste gesag verwelkom word, is waar jy vryheid en geregtigheid vir almal sal vind. Die doel van hierdie boodskap Die doel van hierdie boodskap is om jou aan die Persoon van die Heilige Gees voor te stel. Daar kan boeke vol oor Hom geskryf word. Daar kan dae, maande en selfs jare lank oor Hom gepraat word. Ek en my vrou, Lisa, is al vir meer as dertig jaar getroud. So goed soos wat ek haar ken, ontdek ek nou nog aspekte van haar persoonlikheid, belangstellings, begeertes en maniertjies wat ek nooit geken het nie. Ons was onlangs n paar dae lank alleen saam om ons dertigste huweliksherdenking te vier. In daardie tyd het ek aspekte van haar drome, voorkeure en selfs vermoëns ontdek wat ek nooit geweet het bestaan nie. Wat haar vermoëns betref, het ek nooit geweet wat n aanleg Lisa vir gholf het nie. Sy weet ek geniet die sport baie, en bied toe aan om saam met my die laaste nege putjies op n pragtige gholfbaan te gaan speel. (Ek het net een rondte gespeel, want dit was ons tyd vir saamwees.) By die sewentiende putjie was daar n yslike kloof. My vrou hou altyd van n goeie uitdaging, en ek vra toe of sy die bal wil probeer oorkry. Sy sou omtrent 140 meter ver moes slaan om

11 Wie is die Heilige Gees? 7 die 60 meter diep kloof te oorbrug; as die hou te kort was, sou die bal in die water beland het en verlore wees. Ek het haar n ou bal gegee om af te slaan (want ek het nie gedink ek sou dit ooit weer sien nie). Sy het op die T-kissie aangetree en daardie bal 160 meter ver, tot op die skoonveld aan die ander kant geslaan. Helaas, ná dertig jaar van ge troude lewe is n nuwe talent ontdek. Met ons aandetes het Lisa kennis, wysheid, belangstellings en begeertes aan die lig laat kom wat sy nog nooit tevore met my gedeel het nie. Kortom, ek was verstom oor die diepte van hierdie wonderlike mens wat ek my vrou noem. Dit is onmoontlik om Lisa in n paar hoofstukke volledig te beskryf. Dit kan nie eers in etlike volumes gedoen word nie. Maar wat ek wel kan doen, is om jou te vertel hoe om haar in die hande te kry en met haar te praat. Ek kan jou vertel wat sy geniet, wat haar belangstellings is en hoe om saam met haar te werk en met haar te kommunikeer. Ek kan haar sterk punte en haar swakhede opnoem, asook waarvan sy hou en nie hou nie. Hierdie bekendstelling sal as katalisator kan dien vir n goeie verhouding met haar. As dit heeltemal onmoontlik is om jou alles omtrent Lisa, wat net n paar dekades oud is, te vertel, hoe sal ek ooit naastenby daarin kan slaag om jou alles omtrent die Heilige Gees te vertel as Hy van ewigheid tot ewigheid leef? Ek kan eenvoudig nie! Maar wat ek kan doen, is om jou voor te stel aan wie Hy is. Ek kan jou van sy persoonlikheid vertel, waarin Hy belangstel en waarvan Hy hou. Ek kan ons verhouding met Hom definieer en met jou deel hoe ons by Hom betrokke kan raak en interaksie met Hom kan geniet. Ek kan jou vertel waarom ons verhouding met die Heilige Gees so belangrik is, en hoe Hy ons bemagtig om God se wil vir ons lewens te vervul. Hierdie basiese insigte kan jou na n dieper, meer betekenisvolle verhouding met Hom lei.

12 8 ONTMOET DIE HEILIGE GEES DAG 2 n Ernstige wanbegrip Daar is n fout wat baie mense maak: Hulle probeer die Heilige Gees se werk en mag verstaan sonder dat hulle Hom eers as n Persoon leer ken het. Dit is noodsaaklik dat ons met ons hart en verstand besluit of ons wel glo dat die Heilige Gees n Goddelike Persoon is Een wat oneindig heilig, oneindig wys en oneindig magtig is, maar tog ook wonderlik teer, sensitief en barmhartig. Glo ons Hy is die een wat ons eerbied, liefde, geloof, toewyding en totale oorgawe waardig is? Of glo ons dat die Heilige Gees net n invloed is wat uit God spruit n soort heilige mistieke krag, amper soos waaraan ons dink wanneer ons verwys na n gees van vrygewigheid of n kompeterende gees? Die laasgenoemde beskouing is oppervlakkig, kru en selfs kulties. As ons dit glo, raak ons maklik vatbaar vir geestelike meerderwaardigheid of hoogmoed, wat kan veroorsaak dat ons rondloop asof ons aan een of ander hoër orde van Christendom behoort. As ons Hom egter as oneindig in majesteit, heerlikheid, prag, wysheid, kennis en heiligheid beskou, en as ons glo dat Hy, as n Persoon, saam met die Vader en Seun besit van ons lewe wil neem om dit ten goede te laat meewerk, sal ons in heilige ontsag neerbuig. Iemand wat die Gees van God as n invloed of oppermag beskou, sal altyd sê, Ek wil meer van die Gees hê. Daarteenoor sal iemand wat Hom as n wonderlike Persoon beskou, sê, Hoe kan ek meer van myself aan Hom gee? ² Ons persepsie van Hom Een van die redes waarom baie mense die Gees van God slegs as n invloed beskou eerder as n Persoon, is die manier waarop daar van Hom gepraat word. Het jy al gehoor dat iemand na die Heilige Gees verwys as n dit? Ek is al dertig jaar lank in die bediening en as ek

13 Wie is die Heilige Gees? 9 n Dollar moes hê vir elke keer wat ek gehoor het dat daar na die Heilige Gees as n dit verwys word, sou ek baie ryk gewees het. Ongelukkig mis so baie van ons die volheid van die Heilige Gees se teenwoordigheid omdat ons weier om Hom as n Persoon te eer. Die Gees van God sal nie manifesteer waar Hy nie eerbiedig word nie (sien Matteus 13:54 58; Psalm 89:8). Ek wil daarop wys dat ek nie sê die Heilige Gees is n mens wanneer ek Hom n Persoon noem nie. Ek sê eenvoudig dat Hy eienskappe besit wat ons as n persoonlikheid sal beskou. Die Heilige Gees is Godheid, nie mens nie. Maar ons moet onthou dat mense na die beeld van God geskape is. Hy is dus nie soos ons nie; ons is eerder soos Hy. As n Kerk het ons gekies om Hom as n heilige entiteit te beskou, eerder as Een wat allerheilig is. Hy begeer om ons beste vriend te wees, en tog beperk ons sy betrokkenheid by ons lewens. Die hartseer waarheid is dat ons onbewustelik die mees vervullende verhouding wat daar vir ons bestaan, verwerp het. Kom ons kyk na Skrifgedeeltes wat die persoonlikheid van die Heilige Gees perfek illustreer: Hy het n verstand (sien Romeine 8:27). Hy het n wil (sien 1 Korintiërs 12:11). Hy het emosies soos liefde en vreugde (sien Romeine 15:30; Galasiërs 5:22). Hy versterk ons (sien Handelinge 9:31). Hy praat (sien Hebreërs 3:7); Hy praat inderdaad duidelik (sien 1 Tim. 4:1). Hy leer ons (sien 1 Korintiërs 2:13). Hy kan hartseer gemaak word (sien Efesiërs 4:30). Hy kan beledig word (sien Hebreërs10:29). Hy kan weerstaan word (sien Handelinge 7:51). Hy kan leuens vertel word (sien Handelinge 5:1 11).

14 10 ONTMOET DIE HEILIGE GEES As hierdie eienskappe so duidelik uit die Skrif blyk, moet ons vra: Waarom word die Heilige Gees dan so misverstaan? Die duif Daar is baie mense wat die Heilige Gees met n duif assosieer. Waarom is dit dikwels die eerste gedagte wanneer hulle aan die Heilige Gees dink? Het die Heilige Gees ooit as n duif gemanifesteer? Die antwoord is n onomwonde nee. Ons lees in al vier die Evangelies dat die Gees van God soos n duif op Jesus neergedaal het (sien Matteus 3:16; Markus 1:10; Lukas 3:22; Johannes 1:32). Maar maak ons nie dikwels opmerkings soos, Sy hardloop soos die wind, of Hy is so sterk soos n os nie? As ek sê my seun is so sterk soos n os, maak dit hom n vierpotige dier? Absoluut nie! Om dus te sê dat die Gees soos n duif neergedaal het, beteken nie Hy is n duif nie. Iemand mag miskien sê, Maar John, Hy word voorgestel as vlammende fakkels voor die troon van God (sien Openbaring 4:5). Ja, dit is so, maar die Bybel sê ook, Toe het ek tussen die ouderlinge n Lam sien staan, soos Een wat geslag is (Op. 5:6). Dit is Johannes se beskrywing van Jesus. Ek en jy weet albei dat Jesus definitief nie n vierpotige dier is nie. So ook is die Heilige Gees nie n mistieke fakkel wat voor die Here se troon brand nie. Wie is die Heilige Gees dan? Die Bybel stel dit baie duidelik dat die Heilige Gees die derde Persoon van die Godheid is. Genesis 1:26 sê, God sê toe: Laat Ons n mens maak wat met Ons ooreenstem Let op dat God nie gesê het, Kom Ek maak die mens, nie. Die drama van die skepping het drie unieke Akteurs gehad wat drie unieke rolle gespeel het; God het na Homself verwys as die Vader, die Seun en die Heilige Gees. Kom ons kyk na Handelinge 10:38 om die unieke beskrywing van die Vader, die Seun en die Heilige Gees te sien.

15 Wie is die Heilige Gees? 11 Julle weet ook hoe God Jesus van Nasaret met die Heilige Gees en met krag gesalf het. Jesus het toe rondgegaan, oral goeie werke gedoen en almal gesond gemaak wat onder die mag van die duiwel was, want God was by Hom. In hierdie vers sien ons die Vader wat Jesus met die Heilige Gees salf drie afsonderlike Persone wat met een gemeenskaplike doel in gedagte saamwerk. Kom ons kyk na nog n voorbeeld: Ná Jesus se doop het Hy dadelik uit die water geklim. Net daar gaan die hemel toe vir Hom oop, en Hy sien hoe die Gees van God soos n duif op Hom afdaal. Daar kom toe n stem uit die hemel wat sê: Hý is my geliefde Seun, n Kind so na my hart. Matteus 3:16 17 In hierdie weergawe van Jesus se doop, sal jy weer eens sien dat die Godheid as drie afsonderlike Persone manifesteer. Eerstens was Jesus deur Johannes gedoop, toe het die Gees van God op Hom afgedaal, en laastens het God die Vader uit die hemel gesê, Hý is my geliefde Seun, n Kind so na my hart. Weer eens het al drie hierdie lede met dieselfde doel saamgewerk. Laat my toe om n eenvoudige voorbeeld te noem wat hierdie waarheid illustreer. Water (H2O) kom in drie verskillende vorms voor. Die temperatuur bepaal of water solied, vloeibaar of n gas word. Water se molekulêre struktuur verander nooit nie, maar die voorkoms daarvan verander volgens die omgewing (temperatuur). So ook verander die Here se basiese struktuur glad nie. Wanneer jy die Seun sien, sien jy die Vader; en die Gees is gestuur om die Seun aan ons te openbaar (sien Johannes 17:21; Efesiërs 1:17 18). God is een in doel, en tog kom Hy voor in drie verskillende vorms (Persone) wat unieke funksies vervul. Al is daar drie Persone, is daar net een God. Deuteronomium 6:4 (Die Bybel vir almal ) stel dit soos volg: Israeliete, julle moet luister,

16 12 ONTMOET DIE HEILIGE GEES ons God die Here is een Here. Romeine 3:30 sê, Daar is net een God en daar is net een manier om sy vryspraak te ontvang. So ook sê Jakobus 2:19 (Die Bybel vir almal ), Jy glo dat daar een God is, en dit is reg. Hierdie waarheid is die hoeksteen van die res van die boek: Daar is drie afsonderlike heilige Persone, maar slegs een God. DAG 3 Die eerste Persoon Die Heilige Gees is eintlik die eerste lid van die Godheid in die Bybel. Die eerste vers van die eerste hoofstuk van Genesis lui, In die begin het God die hemel en aarde geskep (v. 1, 1983-vertaling). Kom ons kyk nou na vers twee: Die aarde was heeltemal onbewoonbaar, dit was donker op die diep waters, maar die Gees van God het oor die waters gesweef. Die Gees van God verskyn reeds hier in Genesis 1:2; Hy is die eerste lid van die Godheid wie se naam genoem word. Daar kan gevra word, Maar John, in vers een staan daar, In die begin het God die hemel en aarde geskep. Hoe kan jy sê die Heilige Gees is die eerste lid van die Godheid wat in die Skrif genoem word as die eerste vers God die Vader noem? Dit is n uitstekende vraag. Maar onthou, God het gesê, Laat Ons n mens maak wat met Ons ooreenstem Die verwysing na God in die eerste vers verwys na die Godheid en nie n spesifieke lid van die Godheid nie. Die eerste lid van die Godheid wat dus deur sy funksie geïdentifiseer word, is inderdaad die Heilige Gees. In vers twee lees ons, Die Gees van God (die Heilige Gees) het oor die waters gesweef. Kom ons gaan weer terug na ons oorspronklike vraag: Wie is die Heilige Gees? Ek kan getuig dat Hy die ongelooflikste, wonderlikste, dierbaarste, teerste, sensitiefste, magtigste Persoon op die aarde is. Jy sal miskien sê, John, op die aarde? O ja, op die aarde. Wat ons moet verstaan, is dat die Vader nie hier op aarde is nie; Hy is op sy

17 Wie is die Heilige Gees? 13 troon in die hemel. So ook is Jesus nie hier op aarde nie. Ek hoor gereeld mense sê, Jesus is in my hart, en tog maak die Skrif dit baie duidelik dat Hy aan God se regterhand sit (sien Markus 16:19). In Handelinge 1:9 11 lees ons: Hy het dit gesê, en is toe in die hemelruim opgeneem terwyl hulle toekyk. Hy het in n wolk verdwyn. Toe Hy wegraak en hulle nog stip die hemelruim inkyk, het daar skielik twee mans in wit klere by hulle gestaan. Die twee mans sê toe: Galilese manne, waarom staan julle na die hemel en kyk? Jesus is van julle af weggeneem die hemel in. Hy sal egter nét so terugkom soos julle Hom die hemel sien ingaan het! Die twee mans, wat in werklikheid engele was, het die dissipels duidelik laat verstaan dat Jesus op dieselfde manier sal terugkom as wat Hy weggegaan het. Hy gaan met ander woorde nie na die aarde terugkeer totdat Hy met n wolk terugkom nie. Het Jesus al met die wolke teruggekom? Die antwoord is natuurlik nee. Dit beteken dat Jesus nou nog in die hemel aan God se regterhand is. Dink aan die tyd toe Stefanus gestenig is. Ons lees in Handelinge 7:55 56 (1983-vertaling), Maar Stefanus, vol van die Heilige Gees, het opgekyk na die hemel en die heerlikheid van God gesien en Jesus wat aan die regterhand van God staan. Kyk, het hy gesê, ek sien die hemel geopen en die Seun van die mens wat aan die regterhand van God staan. Probeer jou indink hoe Jesus in al sy heerlikheid tot eer van sy martelaar staan, hoe Hy hierdie heilige oomblik afwag, wat geslag na geslag oorvertel gaan word. Terwyl dit n pragtige storie oor n wonderlike reünie is, dien dit ook as herinnering van die onweerlegbare feit dat Jesus nog steeds aan sy Vader se regterhand sit. Die waarheid is dat Jesus reeds ongeveer tweeduisend jaar lank in hierdie luisterryke posisie is. Hy is nie hier op aarde nie. Ek weet ons hou daarvan om te sê Jesus is in ons harte, maar in werklikheid is dit die Heilige Gees, die Gees van Jesus Christus, wat ons harte sy woonplek maak.

18 14 ONTMOET DIE HEILIGE GEES Dit is belangrik dat ons besef dat daar na die Heilige Gees verwys word as die Gees van God die Vader asook die Gees van Jesus Christus (die Seun). Kom ons kyk na n paar voorbeelde hiervan. In Filippense 1:19 sê Paulus, Ek weet dat deur julle voorbidding en die hulp van die Gees van Jesus Christus alles op my vrylating sal uitloop. Jesus het dit duidelik gemaak dat Hy weg moes gaan sodat die Heilige Gees in sy plek kan kom. Paulus verwys hier na die Heilige Gees (die Helper), nie na die vleesgeworde Jesus nie, want Jesus is nie meer op aarde nie. In Matteus 10:20 verklaar Jesus, Dit sal nie júlle wees wat die praatwerk doen nie, maar die Gees van julle Vader wat julle as sy spreek kanale sal gebruik. Jesus het hier gepraat van die tyd wat sou kom wanneer sy dissipels vervolg en verhoor sou word ter wille van die evangelie. Die Gees van die Vader (die Heilige Gees) sou hulle lei en die regte woorde in hulle monde lê. Selfs hier waar ek skryf, is die woorde nie die uitvloeisel van my intellek of my ervaring nie. Die Gees van my Vader onderrig deur my. Ek het probeer om met my eie krag te onderrig, maar glo my, dit eindig net in n hopelose mislukking. Dit is deur sy genade, die bemagtiging van sy Heilige Gees, dat ek is wie ek is. Die goeie nuus is dat Hy my nog nooit in die steek gelaat het nie Hy is altyd daar. Wanneer ek my nederig aan die Gees van genade onderwerp (sien Hebreërs 10:29), verander Hy my swakheid in krag. Hoe werk die Drie? Hierdie drie-in-een konsep kan baie moeilik wees om te begryp, want dit gaan ons menslike begrip te bowe. In 1 Korintiërs 12:5 7 kry ons insig in hoe die Drie as Een saamwerk. En daar is n hele verskeidenheid bedienings, maar ons dien dieselfde Here. Daar is talle aktiwiteite in die gemeente, maar dit is dieselfde God wat al hierdie dinge kragtig in ons almal aktiveer.

19 Wie is die Heilige Gees? 15 Elkeen van ons ontvang n manifestasie van die Gees om die gemeente te bevoordeel. 1 Korintiërs 12:5 7 In hierdie Skrifgedeelte vind ons uit dat die Vader, die Seun en die Heilige Gees verskillende rolle vervul. Die Vader aktiveer (v. 6), die Seun bedien (v. 5) en die Heilige Gees manifesteer (v. 7); tog werk hulle almal met dieselfde doel saam. Wat sou ek of jy moes doen as ons n huis wou bou? Ons sou n argitek, n voorman en werkers (subkontrakteurs) moes aanstel om die huis te bou. In hierdie voorbeeld is God die Vader die argitek, Jesus is die voorman en die Heilige Gees word verteenwoordig deur die werkers wat die huis bou Hy is die manifesteerder van die skepping. Al drie rolle is noodsaaklik vir die bou van enige huis. Die vinger van God Kom ons kyk na twee verskillende weergawes van dieselfde gebeurtenis in die Skrif. Jesus het pas n man genees wat van die duiwel besete was. Die mense was verbaas, maar die Fariseërs het gedink, Hy kry sy krag van Beëlsebul, die baasduiwel (sien Matteus 12:24). In vers 28 lees ons Jesus se reaksie op hulle opinie: Maar as dit die Gees van God is wat My in staat stel om die duiwels uit te dryf, moet julle besef dat die koningsheerskappy van God nou by julle is. Lukas gee nog n weergawe van hierdie verklaring, maar syne verskil effens van dié van Matteus. Lukas 11:20 (1983-vertaling) lui, Aangesien Ek dus deur die vinger van God bose geeste uitdryf, het die koninkryk van God inderdaad tot by julle gekom. Lukas en Matteus verwys albei na die Heilige Gees. Soos wat skrywers dikwels doen, beskryf Lukas die Heilige Gees se funksie eerder as sy Persoon. Ons kan dus aflei dat die Heilige Gees as die vinger van God beskryf kan word. Die Heilige Gees se funksie word nie net as die vinger van God beskryf nie, maar ook as die hand van God of die arm van God. Die

20 16 ONTMOET DIE HEILIGE GEES Skrif beskryf hoe God sy volk met n sterk hand en uitgestrekte arm verlos het (Ps. 136:12). Psalm 8:4 verklaar, Wanneer ek opkyk na die naghemel en ek sien die werke van u vingers, die maan en sterre wat U in hulle plekke geplaas het Die meeste gelowiges besef nie dat die Heilige Gees die Een is wat die sterre en die planete in die hemel geplaas het nie; Hy is die een wat die hele skepping gemanifesteer het. Onthou, ons het in Genesis 1:2 gelees die Gees van God het oor die waters gesweef. Hy het vir die Vader gewag om dit in werking te stel. Toe moes die Seun bedien deur te sê, Laat daar lig wees, want Jesus is die Woord van God. Toe daar gesê is Laat daar lig wees, het die Seun die Vader se wil uitgevoer en die Heilige Gees het dit wat gesê is, geskep. Een van my gunsteling Skrifgedeeltes oor die grootheid en heerlikheid van die Gees van God, is Jesaja 40:12 15, wat as volg lui: Wie anders het die oseane in sy hand gehou? Wie het die hemel afgemeet met die breedte van sy hand? Wie het die grond van die aarde met n maatemmer gemeet, of het die berge en die heuwels met n skaal geweeg? Wie kan die Gees van die Here advies gee? Wie weet genoeg om Hom raad te gee of Hom te leer? Het die Here al ooit raad van ander nodig gehad? Het Hy nodig dat iemand Hom vertel wat die goeie is of wat die beste is? Al die nasies van die wêreld is vir Hom soos n druppel in n emmer, soos stof op n skaal. Hy tel die eilande op asof hulle geen gewig het nie. In vers twaalf lees ons, Wie het die hemel afgemeet met die breedte van sy hand? Jy kan dus sien dat die Heilige Gees aan sy funksie geïdentifiseer word. En dink daaraan Die Gees van die Here het die oseane in sy hand gehou. Sien jy hoe magtig Hy is? En tog is Hy so nederig dat Hy met die Vader en Seun saamgestem het om in ons te kom woon. Wat n wonderbaarlike, ontsagwekkende werklikheid!

21 Wie is die Heilige Gees? 17 DAG 4 Die Heilige Gees is God Kom ons kyk na die rol wat die Heilige Gees in die skepping van die mens gespeel het. Ons lees, Die Here God het toe die mens gevorm uit stof van die aarde en lewensasem in sy neus geblaas, sodat die mens n lewende wese geword het (Gen. 2:7, 1983-vertaling). Die Heilige Gees is eintlik die Een wat Adam gevorm het en asem in sy neus geblaas het. Hoe weet ek dit is waar? Job 33:4 sê, Die Gees van God het my gemaak, die asem van die Almagtige gee my lewe. Die Heilige Gees het nie net vir Adam gevorm en lewe in sy neus geblaas nie, Hy het my en jou gevorm en lewe in ons geblaas. Psalm 139:13 lui, U self het my diepste wese gemaak, my in die moederskoot gevorm. Om die waarheid te sê, die Heilige Gees het alles gevorm wat ons sien, want in Jesaja 42:5 staan daar, Hy het die aarde gemaak en alles wat daarop is. Die skepping wat ons sien, is gemanifesteer omdat die Heilige Gees die Vader se skeppingsbegeerte uitgevoer het. Ek hoop dit is vir jou duidelik dat die Heilige Gees God is. Kom ons kyk na die verskillende name wat in die Skrif vir Hom gebruik word: Heilige Gees (104 keer) Gees van die Here (21 keer) Gees van God (22 keer) Ewige Gees (Heb. 9:14, NLV & 1983-vertaling) Helper (7 keer in die Evangelie van Johannes, Die Bybel vir almal) Trooster (Joh. 15:26, 1953-vertaling) Heilige (Ps. 78:41, NLV & 1983-vertaling) Die Here (2 Kor. 3:17) Gees van die waarheid (4 keer)

22 18 ONTMOET DIE HEILIGE GEES Gees van Christus (Rom. 8:9; 1 Pet. 1:11) Gees van Jesus Christus (Fil. 1:19) Gees van wysheid (Jes. 11:2, NLV & 1983-vertaling) Gees van raad (Jes. 11:2, NLV & 1983-vertaling) Gees van kennis (Jes. 11:2, NLV & 1983-vertaling) Gees van insig (Jes. 11:2, NLV & 1983-vertaling) Gees van sterkte (Jes. 11:2, NLV & 1983-vertaling) Gees van eerbied vir die Here (Jes. 11:2, NLV & 1983-vertaling) Gees van julle Vader (Matt. 10:20) Gees van heerlikheid (1 Pet. 4:14, NLV & 1983-vertaling) Gees van welwillendheid (Sag. 12:10, NLV & 1983-vertaling) Gees van genade (Heb.10:29, NLV & 1983-vertaling) Gees van oordeel (Jes. 4:4) Gees wat verteer (Jes. 4:4, 1983-vertaling) Gees wat lewe gee (Rom. 8:2, NLV & 1983-vertaling) Gees van krag (2 Tim. 1:7, NLV & 1983-vertaling) Gees van liefde (2 Tim. 1:7, NLV & 1983-vertaling) Gees van selfbeheersing (2 Tim. 1:7, NLV & 1983-vertaling) Gees wat profesie gee (Op. 19:10, 1983-vertaling) Gees van openbaring (Ef. 1:17, 1953-vertaling) Gees van heiligheid (Rom. 1:4, 1953-vertaling) Gees van die heilige gode (4 keer in Daniël) Hy is waardig, Hy is magtig en Hy is ontsagwekkend! Jesus het volkome op die Heilige Gees staatgemaak Jesus was heeltemal afhanklik van die Heilige Gees. Hy is deur die Gees verwek, Hy is deur die Gees onderrig, Hy is by die Jordaanrivier deur die Gees bemagtig, en Hy het nie een wonderwerk verrig voordat

23 Wie is die Heilige Gees? 19 Hy deur die Gees gedoop was nie (sien die beskrywing van die eerste wonderwerk wat Jesus in Kanaän in Galilea verrig het: Johannes 1:29 34 en 2:1 11). Hy is deur die Gees gelei en het net gesê wat Hy die Gees hoor sê het. In Johannes 14:10 (1983-vertaling) sê Jesus, Die woorde wat Ek met julle praat, praat Ek nie uit my eie nie; maar dit kom van die Vader wat in My bly en sy werke doen. Let daarop dat Jesus nie sê die Vader in die hemel nie, maar eerder die Vader wat in My bly. Wag n bietjie, John, bedoel jy Jesus verwys na die Heilige Gees as sy Vader? Waarom sal Hy nie? Luister na wat die engel vir Josef gesê het: Moenie huiwer om voort te gaan met jou huwelik met Maria nie. Die Kindjie wat sy dra, is verwek deur die Heilige Gees (Matt. 1:20). Jesus was deur die Heilige Gees verwek, wat dus sin maak dat Hy na die Heilige Gees verwys as die Vader wat in My bly. Die waarheid is dat Jesus en die Heilige Gees altyd saamgewerk het tydens Jesus se tyd op aarde. Jesus het self hierdie stelling gemaak: Die Seun kan niks uit sy eie doen nie (Joh. 5:19). As Jesus die Seun van God Self hierdie deurlopende vennootskap met die Heilige Gees nodig gehad het om sy missie te voltooi, hoeveel te meer het ons nie die Gees nodig om ons te help om ons missie te bereik nie? Niemand ken die Heilige Gees beter as Jesus nie; kom ons kyk dan na wat Jesus sê van die Heilige Gees se rol, persoonlikheid, eienskappe, krag en ander vermoëns in ons lewens. In Johannes 14:15 18 verklaar Jesus: As julle My liefhet, sal julle my opdragte gehoorsaam. En Ek sal die Vader vra en Hy sal vir julle n ander Raadgewer stuur om vir altyd by julle te wees; dit is die Gees van die waarheid. Die wêreld is nie in staat om Hom te ontvang nie omdat hy Hom nie sien of ken nie. Julle ken Hom egter, omdat Hy by julle gaan bly en in julle sal woon. Ek sal julle nie soos wesies in die steek laat nie; Ek kom terug na julle toe.

24 20 ONTMOET DIE HEILIGE GEES Daar is soveel kosbaarhede in hierdie Skrifgedeelte. Eerstens sien ons dat Jesus sê, As julle My liefhet, sal julle my opdragte gehoorsaam. Dit is interessant dat Jesus sy kommentaar oor die Heilige Gees voorafgaan deur na sy oppermag, sy heerskappy te verwys. Hy beklemtoon ons gehoorsaamheid aan sy gebooie. Petrus bevestig dit: Óns is getuies hiervan, ons en die Heilige Gees wat God gegee het aan dié wat aan Hom gehoorsaam is (Hand. 5:32). God gee die Heilige Gees aan dié wat Hom gehoorsaam. Kyk nou na wat Jesus in Johannes 14:16 sê: En Ek sal die Vader vra en Hy sal vir julle n ander Raadgewer stuur. Kom ons kyk na die Grieks vir ander. Daar is twee Griekse woorde wat in die Nuwe Testament as nog n of ander vertaal word. Hierdie Griekse woorde is heteros en allos. Heteros beteken n ander, verskillende soort. Allos beteken n ander van dieselfde soort.³ Die vraag wat ons moet vra, is watter woord gebruik Jesus hier? Voordat ek dit beantwoord, wil ek n voorbeeld gee wat die verskil tussen hierdie twee Griekse woorde sal illustreer. Verbeel jou hierdie scenario: Ek gee jou n vrug, soos n appel. Nadat jy die appel geëet het, vra ek jou, Wil jy nog n vrug hê? As jy Ja antwoord en ek vir jou n lemoen gee, het ek vir jou n ander gegee. Maar ek het jou n ander, verskillende soort gegee. n Lemoen is n soort vrug, maar dit is n ander soort vrug as n appel. Dit is n voorbeeld van heteros. As jy egter vir nog n vrug gevra het en ek vir jou nog n appel gegee het, sal jy sê ek het vir jou n ander van dieselfde soort gegee. Dit is n voorbeeld van allos. Kom ons gaan terug na die oorspronklike vraag. Toe Jesus sê die Vader sal vir ons n ander Raadgewer stuur, watter woord gebruik Hy? Hy gebruik die woord allos. Hy sê dus, Die Vader gaan vir julle n ander Raadgewer stuur wat net soos Ek is. Met ander woorde, Jesus sê Hy en die Heilige Gees is van dieselfde soort.

25 Wie is die Heilige Gees? 21 DAG 5 Ons lewenslange metgesel Nog n woord wat Jesus in Johannes gebruik, is die woord Helper. Die Griekse woord vir helper is parakletos. Johannes verwys ook in een van sy Briewe na Jesus as parakletos: My kinders ons het n Helper (parakletos) by die Vader wat ons saak stel, Jesus Christus, die regverdige (1 Joh. 2:1). Jesus en die Heilige Gees vervul albei hierdie rol van helper of parakletos. Wat beteken hierdie Griekse woord dus? In die spreektaal van daardie tyd was dit gebruik om n raadgewer te beskryf wat iemand se saak bepleit. 4 Dit was ook gebruik om n persoonlike raadgewer of afrigter te beskryf n lewensafrigter. Parakletos is saamgestel uit die twee Griekse woorde para en kaleo. Para beteken baie na aan. 5 Paulus het hierdie woord gebruik om sy verhouding met Timoteus te beskryf. Daar was niemand nader aan Paulus as die apostel Timoteus nie (sien Filippense 2:20). My vrou, Lisa, is para my. Daar is niemand op aarde nader aan my as wat sy is nie. Ek sou daardie woord gebruik om my verhouding met haar te beskryf. Die tweede Griekse woord, kaleo, beteken om nader te wink of te roep. 6 Hierdie woord word dikwels in die Skrif gebruik waar die apostels hulle roepings beskryf. Toe Paulus byvoorbeeld gesê het dat hy geroep is as apostel onder die nie-jode, het hy die woord kaleo gebruik. Die konsep van n roeping dui op bestemming en aksie. Wanneer ons hierdie twee Griekse woorde saamvoeg, kry ons n baie beter begrip van wat Jesus sê. Hy sê in effek dat die Heilige Gees permanent tot naby ons almal geroep word om ons af te rig en leiding, onderrig en raad op ons lewenspad te gee. Dit is sy roeping, of op drag, en Hy loop die pad saam met ons sonder om ooit moeg te word! Jesus het gesê dat die Heilige Gees vir altyd by ons sal wees (Joh. 14:16). Hy sal ons nooit verlaat of in die steek laat nie. Wat n wonderbaarlike belofte! Jesus sê eintlik dat die Heilige Gees n voortsetting van sy (Jesus se) werk en missie in ons lewens sal wees.

26 22 ONTMOET DIE HEILIGE GEES Ek hoor dikwels mense sê, Ag, as ek tog maar net saam met Jesus kon wees, sou ek Hom soveel vrae gevra het. Nou waarom nie daardie vrae vir die Heilige Gees vra nie? Hierdie is n baie belangrike aspek van ons begrip van die Heilige Gees. As ons Hom net as n vae entiteit beskou, sal ons nie na Hom toe gaan as Een wat ons kan lei of leer nie. Die Heilige Gees is Godheid, nie n entiteit nie. As ons waarlik glo Hy is wie die Woord van God sê Hy is, sal ons Hom met eerbied nader, met die besef dat Hy die alwetende en almagtige Een is wat bereid en in staat is om ons te leer, te help en af te rig. Ja, Hy wil graag intiem met ons praat. Ongelukkig is die Heilige Gees die mees geïgnoreerde Persoon in die Kerk. Hoeveel keer kom ons nie byeen waar Hy nie eers vereer of selfs genoem word nie? Hoe dikwels bestee ons nie n oggend, middag, aand of selfs n hele dag sonder om n enkele woord vir die Een te sê wat geroep is om permanent in ons en by ons te wees nie? n Verrassende stelling In Johannes 16:7 maak Jesus n verbysterende stelling: Laat Ek julle egter die waarheid vertel Voordat ons verder gaan met hierdie Skrifgedeelte, wil ek eers vir jou n prentjie skets. Dit is Jesus wat met sy dissipels praat. Hy was meer as drie jaar lank saam met hierdie manne. Alles wat hy nog ooit gesê het, het gebeur. Hy het gesê die wind moet gaan lê en dit het gaan lê. Hy het gesê hulle sal by n sekere plek n donkie kry, en waarlik, die donkie was daar. Hy het geweet daar was n verraaier onder sy mense selfs voordat die verraaier homself geopenbaar het. Hy het n vyeboom beveel om op te hou vrugte dra en die boom het verskrompel. Alles wat Jesus gesê het, het gebeur, en tog het Hy hierdie stelling begin met die woorde, Laat Ek julle egter die waarheid vertel Wat Jesus basies van plan was om te sê, sou sy dissipels verbyster, en Hy moes dus seker maak dat hulle weet dit is die waarheid. Wat sê Jesus dan hierna? Laat Ek julle egter die waarheid vertel:

27 Wie is die Heilige Gees? 23 Dit is tot julle voordeel dat Ek weggaan, want as Ek nie weggaan nie, sal die Raadgewer (parakletos), die Heilige Gees, nie na julle toe kom nie. As Ek egter weggaan, sal Ek die Raadgewer na julle toe stuur (Joh. 16:7). Plaas jouself in die plek van die dissipels. Jou leier, wat jy weet is die Seun van God, het vir jou gesê dat Hy moet weggaan en dat dit tot jou voordeel sal wees. Dit sou vir my verregaande klink. As Hy die Here is, sal dit nie vir jou beter wees as Hy bly nie? Ek is seker die dissipels het ook so gevoel. Om daardie presiese rede het Jesus sy stelling begin deur te sê, Laat Ek julle egter die waarheid vertel. Waarom was dit dan die beste vir die dissipels en die daaropvolgende geslagte van gelowiges ek en jy ingesluit dat Jesus weggaan? Dink so daaraan: As Jesus nooit van die aarde af weggegaan het nie, sou die Heilige Gees nooit na ons toe gekom het nie. As ek iets van Jesus wou ontvang, sou ek baie kilometers moes reis net om Hom te sien. Ek sou waarskynlik Tel Aviv toe moes vlieg (wat die besigste lughawe in die wêreld sou wees). Dan sou ek n motor moes huur en Galilea toe moes ry in die hoop om daar een of ander aanvaarbare akkommodasie te kry (en die hotelle sou oorvol gewees het). Dan sou ek Jesus moes vind. Dit sou nie te moeilik gewees het nie, want daar sou miljoene mense wees wat wag om met Hom te praat. Nadat ek Hom gevind het, sou ek moes staan en wag in van die besigste rye wat die mensdom ooit gesien het, want almal sou n vraag of n versoek vir Hom gehad het. Aangesien daar sulke lang rye sou wees, sou ek waarskynlik n mak simum van 60 sekondes saam met Jesus kon deurbring, en ek sou dus definitief moes regstaan met my vrae of versoeke. En onthou, Hy sou moes eet en slaap, en sou dus miskien net omtrent veertien uur per dag gehad het om aan die massas te wy. Teen hierdie trant sou Jesus 840 mense per dag kon sien as Hy 60 sekondes met elkeen deurbring. Met ander woorde, dit sou Jesus dae (3,26 jaar) geneem het om n miljoen mense te sien. Maar onthou, daar sou

28 24 ONTMOET DIE HEILIGE GEES konstant nuwe mense by die rye aansluit en wat as daar n vinnige ry was vir dié wat werklik in die nood was? Daardie mense sou alewig voor my in die ry kon kom, nie waar nie? Ek dink jy kan aanneem dat dit feitlik onmoontlik sou wees om by Jesus uit te kom, en definitief onwaarskynlik. Die goeie nuus is dat die Heilige Gees altyd daar is vir ons. Hy hoef nie te slaap of te eet nie. Hy kan terselfdertyd biljoene gesprekke met biljoene verskillende mense voer. As ons toelaat dat ons begrip van die Heilige Gees radikaal deur die Woord van God verander word, sal ons verstaan waarom Jesus kon sê, Dit is tot julle voordeel dat Ek weggaan. Onthou, die Heilige Gees is net soos Jesus: Hy onderrig soos Jesus, Hy verduidelik die dinge van God soos Jesus, en Hy is hier by ons! Begin jy nou insien hoe ongelooflik Hy is? Selfs terwyl ek hier skryf, is die Gees besig om my insig te gee in hoe ek sy stem en teenwoordigheid in my lewe beperk het. Weer eens Hy is ons gids, berader, beskermer en afrigter. Hy moet aktief by ons lewens betrokke wees! In die volgende hoofstuk sal ons verder ingaan op wat dit beteken om n inniger verhouding met ons ontsagwekkende Here te hê.

29 Also Available From John and Lisa Bevere: The Holy Spirit: An Introduction The Holy Spirit is frequently misunderstood, leaving many clueless about who He is and how He expresses Himself to us. He is often portrayed as something weird. But the Bible makes it clear that the Spirit is not something. He is Someone a Person who has promised to never leave your side. In The Holy Spirit: An Introduction, John Bevere invites you into a personal discovery of the Person and work of the Holy Spirit. Available in Afrikaans as Ontmoet die Heilige Gees.

30 Pathway to His Presence Do you find it difficult to forgive and forget? Do you spend more time worrying about the acceptance of others than the approval of God? Each section addresses a specific barrier and will bless you with five devotions complete with key spiritual strategies and specific prayers designed to help you along the path that ultimately brings you before Almighty God! Begin to move on the journey and see God move in your life. Available in Afrikaans as Die soektog van n leeftyd. Without Rival There is a reason we look at others as rivals and limit ourselves to comparison and competition. We have an enemy assaulting our mind, will and emotions in the hope that we ll turn on ourselves and each other. It s a cycle that isolates us from intimate connections, creates confusion about our identity, and limits our pupose. In Without Rival, best-selling author Lisa Bevere shares how a revelation of God s love breaks these limits. It s time to step forward to live a life without rival. Available in Afrikaans as Jy is sonder gelyke. Good or God? If it s good, it must be God. Right? These days the terms good and God seem synonymous. We believe what s generally accepted as good must be in line with God s will. Generosity, humility, justice good. Selfishness, arrogance, cruelty evil. The dis tinction seems pretty straightforward. But is that all there is to it? If good is so obvious, why does the Bible say that we need discernment to recognize it? Available in Afrikaans as Goeie werke of God?

31 Lizzie die leeutjie SOMETIMES THE BRAVEST THING YOU CAN DO IS ASK FOR HELP! Encourage your little ones with the true meaning of bravery through the beautiful story of Lizzy the lioness by New York Times bestselling author Lisa Bevere. Boys and girls will love the story of Lizzy, a little lion who must learn what it truly means to be brave in the face of hard things. When she sees someone in danger, Lizzy tries her best to help, but she quickly learns that sometimes being brave means asking adults for help. With a unique spin on the concept of bravery, Lizzy the Lioness is a timely picture book in an ever-changing world. Children will see that bravery is so much more than big muscles or loud roars it is often found in the tiniest people who have the courage to speak up when no one else will. By asking God for help and then bringing grown-ups into the picture, Lizzy shows kids that being brave doesn t have to happen by yourself it happens with help! AVAILABLE AT ALL LEADING BOOKSTORES IN SOUTH AFRICA. FOR MORE INFORMATION, PLEASE sales@struikchristianmedia.co.za

32 Ontdek die Persoon en werk van die Heilige Gees. Die Heilige Gees word dikwels misverstaan, en baie mense het geen idee Wie Hy regtig is en hoe Hy Homself aan ons openbaar nie. Die Heilige Gees word dikwels as n vreemde verskynsel uitgebeeld. Die Bybel maak dit egter duidelik dat die Gees nie net iets is nie, maar iemand n Persoon wat belowe het om ons nooit te verlaat nie. Dit is onmoontlik om alles van die Heilige Gees te wete te kom, maar die Bybel vertel vir ons genoeg om n innige verhouding met Hom te hê. In Ontmoet die Heilige Gees wil John Bevere jou daarmee help. Hy stel jou voor aan die Persoon van die Heilige Gees; vertel jou van sy persoonlikheid, waarin Hy belangstel en waarvan Hy hou; definieer jou verhouding met Hom; deel met jou hoe jy by die Heilige Gees betrokke kan raak en met Hom kan kommunikeer; en help jou om te verstaan waarom ons verhouding met die Heilige Gees so be langrik is, en hoe Hy ons bemagtig om God se wil vir ons lewens te vervul. Hierdie basiese insigte is die padkaart wat jou na n dieper, meer betekenisvolle verhouding met Hom kan lei. Ontmoet die Heilige Gees is veeldoelig deels boek, deels Bybelstudie en deels groepstudie. Elke hoofstuk is opgedeel in vyf voorgestelde leesstukke met ooreenstemmende Bybelstudies aan die einde van die hoofstuk. Na die Bybelstudies is daar n afdeling met besprekingsvrae vir groepstudie. John Bevere en sy vrou Lisa is die stigters van Messenger International. John lewer beginselvaste boodskappe en waarhede deur middel van bekroonde kurrikulums en topverkoperboeke wat reeds in meer as 60 tale vertaal is, waaronder Die strik van Satan en Goeie werke of God?. Hy is n internasionale spreker en mede-aanbieder van die The Messenger-televisieprogram wat wêreldwyd uitgesaai word. ISBN