Jaargang 19, Nr. 1 Mrt Neil du Plessis

Transcription

1 Jaargang 19, Nr. 1 Mrt 2018 Neil du Plessis Die afgelope klompie jare het die vyfletterwoordjie grond ʼn uiters sensitiewe en kontroversiële onderwerp geword in die nuwe Suid-Afrika. Dit word bevestig deur die populistiese retoriek van sommige politici, grond-oudits en waardasies, gewelddadige plaasaanvalle, BEE inisiatiewe en die onlangs-goedgekeurde mosie in die Parlement wat wysigings aan die Grondwet wil maak om grond te onteien sonder vergoeding. Dit is moeilike sake wat die potensiaal het om emosies van woede te laat opvlam, beleggersvertroue te skaad en ʼn land se ekonomie in duie te laat stort indien dit nie met die grootste omsigtigheid hanteer word nie. Oplossings gaan beslis nie vanuit die politieke sfeer alleen kom nie. Samewerking en nuwe denke sal uit alle oorde moet kom: van die openbare sektor, die finansiële wêreld, georganiseerde landbou, politici en ja, ook van gelowiges en die kerk. Van die vroegste tye af het gelowiges ʼn baie hegte verhouding met grond. Op ʼn manier sou ons kon sê dat grond ook op ʼn diep teologiese vlak definieer wie en wat ons is. Reeds in die boek Genesis lees ons dat God die mens en die diereryk geskep het uit grond (stof en klei). Die mens is ook aangestel as verteenwoordiger van God om die grond van die aarde te bewoon en te bewerk. Wanneer die einde van ons lewe aanbreek en die spreekwoordelike streep in die grond getrek word, stel die ou begrafnisformulier dit mooi: Uit stof (grond) is jy gemaak en tot stof (grond) sal jy terugkeer. Hoewel daar baie teksverwysings in die Bybel is na fisiese grond stel geloof ook veral belang in die vrugbare grond van die hart. Een van die mooi gelykenisse wat Jesus in dié verband vertel is juis van ʼn saaier se saad wat op verskillende tipes grond val (vgl. Lukas 8). Jesus verduidelik die simboliek hiervan en sluit af met die woorde in vers 15: Die deel wat in goeie grond val, dui op dié wat die woord met n goeie en opregte hart hoor en dit bewaar en deur volharding vrug dra. Hoewel jou fisiese grond ʼn belangrike deel uitmaak van wie jy is en dit elke mens se reg is om sy stukkie grond te besit, word die waarde van jou menswees op die ou end, ja selfs lank ná die verband van die bank afgelos is, gedefinieer deur die kwaliteit vrugbare grond van jou hart. Wanneer ons toelaat dat die Here in ons en deur ons lewens werk is daar ʼn oes uit die grond van die hart wat in geen ekonomiese terme waardeer kan word of in ʼn titelakte saamgevat kan word nie. Wanneer ons dink oor die moeilike kwessie van grond moet ons ook Jabes se gebed in 1 Kronieke 4:9-10 in gedagte hou. Hy bid spesifiek vermeerder my grondgebied Here, met ander woorde vermeerder my invloed hier waar ek geplant is, hier waar ek woon, werk en ʼn lewe maak. Ons gesindhede weerspieël baie meer van die vrugbare grond van die hart as wat ons dalk wil toegee. Terwyl die moeilike saak van grond as ʼn geleentheid of ʼn slaanstok op ons drumpel lê, vier ons binnekort Paasfees en kan ek nie help om ook aan ʼn ander stuk grond uit die Paasverhaal te dink nie. Hierdie stuk grond bevat nie ʼn grênd huis of ʼn wolkekrabber met kantore nie. En tog, ten spyte van die oënskynlike waardeloosheid daarvan het dit die geskiedenis vir altyd verander en mense gehelp om totaal nuut oor hulle waarde te dink. Die stuk grond is natuurlik Golgota (Kopbeenplek). Die plek waar Jesus gekruisig is, het ʼn nuwe waardasie gegee aan die lewe van ʼn mens. Ons is nou veel meer as ʼn bankwaardasie, ʼn verband en ʼn titelakte. Ons is veel meer as wat ons besit. Ons waarde word veral bereken in terme van wie ons is in Hom. Mag hierdie waarheid ons voete stewig op die grond hou en ons in staat stel om met die regte gesindheid ʼn verskil te maak in die lewens van ander.

2 Jabes het die God van Israel aangeroep met die woorde: Stort U seën oor my uit, vergroot my grondgebied, neem my onder U beskerming en weerhou onheil van my sodat geen smart my tref nie. God het laat gebeur wat hy gevra het (1 Kronieke 4:10). 5,500 lidmate op ons boeke waarvan 3,760 belydende lidmate en 1,740 dooplidmate is. 2017/2018 Boekjaar inkomste Kerkbywoners op Sondae in 2016 Kerkbywoners op Sondae in 2017 Kollekte tydens eredienste Maandelikse dankoffers Dankfees 2017 vs 2018 ± 42,000 ± 40,000 Styg met 9.7% teenoor vorige boekjaar Styg met 9.75% teenoor vorige boekjaar Styg met 58.2% teenoor vorige boekjaar UITGAWES 2017/2018 BOEKJAAR Spandering aan ons vier kernwaardes 4% Kerngesonde jeugbediening 2018 Kerkbywoners op Sondae in 2016 Kleuterkerk-inskrywing 90 KIX-inskrywings Kerkbywoners op Sondae in JonkX-inskrywings 160 Kollekte tydens eredienste Groot Maandelikse getalle dankoffers in 2017 Ons Dankfees eindig 2017 met vs 2018 ʼn oorskot van R115k teenoor ʼn begrote tekort van R1.123m. Die basaar lewer R105k op teenoor vorige boekjaar se R70k. Die dankfees lewer R342k op teenoor die R130k van die vorige jaar. Het jy geweet? 100 gemiddelde aantal babas per jaar gedoop. 120 kinders per dag by pretweek in die Julieskoolvakansie. 900 etes bedien tydens pretweek. 100 laerskoolkinders by elke speletjiesaand. 450 mense wat elke jaar by die basaar werk. R6 gemiddelde prys van items by die Silwerhoekie se jumble sale. 600 koorlede betrokke by koorfees. 25 personeellede (sommige slegs op kontrak). 58 jare ervaring van die vier permanente leraars by NG Weltevreden. Baie dankie aan elkeen se ondersteuning die afgelope jaar. Sonder u finansiële en ander ondersteuning sou ons nie ons visie Om te Lewe vir die Stad kon uitleef nie! 2 WELTEWOORD I Maart 2018 Vinnige feite Ons bydraes aan die Ring en Sinode het in 2017 R622,777 beloop. Ons het n addisionele R238,141 aan Diens van Barmhartigheid spandeer.

3 Santjie Dixon is ʼn getroue en betrokke lid van ons gemeente. Op ʼn weeksdag sal jy haar heel moontlik in hardloopklere van Run/Walk for Life op die kerkterrein sien. Nadat sy in 2010 ʼn totale mastektomie van die regterbors ondergaan het, is kanker in 2016 weer by haar gediagnoseer. Sy vertel ons ʼn bietjie van haar reis met kanker. In November 2016 het ek ʼn roetine mammogram gehad, waarna die radioloog my ingeroep het om te sê dat ʼn biopsie nodig was. Ek het nie veel daarvan gedink nie. Ek het in 2010 ʼn totale mastektomie van my regterbors gehad en het aanvaar dat dit net ou letsels was van vorige chirurgie; tot toe het alles net goed gegaan. Op 8 Desember is die biopsie gedoen en ʼn paar dae later het die radioloog my meegedeel dat daar ʼn significant massa in my linkerbors is. Steeds het dit nie ingesink nie; ek het gedink sy sê insignificant. Ek is die volgende maand geopereer ʼn totale mastektomie met die verwagting dat ʼn rekonstruksie onmiddellik gedoen sou word. Dit het helaas nie gebeur nie en ek het ook vir ʼn paar dae ernstige asemnood gehad. Uiteindelik is ek huis toe. Tydens ʼn opvolgbesoek het ek gehoor dat ek die onkoloog so gou moontlik moes sien. Dit was graad 3 kanker. Al die kliere wat verwyder is, 17 van hulle, was positief en die bloed in die borsweefsel was ook deur die kanker aangetas. Dit het nie rooskleurig gelyk nie; volgens die onkoloog was die kans dat ek 2018 sou sien maar 5% indien ek nie behandeling sou ondergaan nie. Ek het so gou moontlik met behandeling begin en net voor Valentynsdag die Rooiduiwel aangepak. Ek was nooit bang nie. Met die ondersteuning van die gemeente, my Run/Walk for Life lede en my familie het dit gevoel soos net nog ʼn operasie of iets waardeur ʼn mens maar net moes kom. Ek is vertel dat die Rooiduiwel ʼn erge tipe chemoterapie is en na die eerste behandeling het my bloedtelling so laag geval dat ek byna gehospitaliseer is, maar uiteindelik het ʼn inspuiting die ding gedoen. ʼn Mens kan blykbaar baie siek word van hierdie behandeling. Ek was egter net moeg en het baie geslaap. Die skok van haarverlies was nogal erg maar daaroor het ek ook gou gekom. Ek is baie lief vir Psalm 103 in die 1983-vertaling asook The Message en as dinge erg geraak het, het ek dit oor en oor gelees: 3 Dit is Hy wat al my sondes vergewe, wat al my siektes genees, 4 wat my red van die graf en my met liefde en ontferming kroon. Ek het soveel seën ontvang dat ek gou kon teruggaan Run/Walk for Life toe en op 27 April het ek ʼn 10km wedloop in die Cradle gedoen pas na die Rooiduiwel! Ek het weer in Mei, Junie en Julie aan 10km-wedlope deelgeneem al was ek nog besig met twee rondes chemo wat op die Rooiduiwel gevolg het. Ek het dit weekliks vir drie maande ontvang. Terselfdertyd is ek ook met Herceptin behandel, wat nou amper afgehandel is. Ons is so geseën dat hierdie duur produk deur die mediese fonds goedgekeur is. Die bestraling was vir my die ergste. Ek het vir 48 dae bestraling ontvang. Ek het nou nog ʼn paar sonbrandletsels, maar dit is ʼn klein bysaak. Die dokter sê op papier is ek gesond. Ek twyfel nie daaroor nie. My energievlakke is hoog en ek het nuwe drome en doelwitte en wil nog vir baie lank ʼn verskil maak al is dit net in een persoon se lewe. Ek wil vir enigiemand sê wat hierdie pad loop daar IS lig aan die einde van die tonnel. ʼn BAIE GROOT lig en daar is selfs voordele! In plaas van my yl haartjies, was daar pragtige pruike en doeke om te dra. Tans het ek ʼn krulkop! Jy tref dit dalk ook gelukkig om ʼn rekonstruksie te kry en dan voel ʼn mens sommer weer jonk en mooi. As jy sou vra hoekom, vra ook soos Carike Keuzenkamp: Hoekom nie! Ons is almal een dood skuldig en dit is ʼn reis wat ons almal eendag moet aanvaar, maar die tweede dood is ʼn keuse. Tydens so ʼn reis word ʼn mens baie met die lewe, meer as met die dood, gekonfronteer en ek het besef ʼn mens kan steeds asemhaal, maar alreeds dood wees. Ek wil nie so wees nie. Of jy siek of gesond is, besef waar jou afhanklikheid lê en Hy sal jou paaie gelyk maak. Jy sal nie afslag of light duty kry nie, maar jy sal cope! Ek wil net dank betuig en die Here loof! Maart 2018 I WELTEWOORD 3

4 In Maart word die fokus landwyd op maatskaplike werkers en die wonderlike werk wat hulle in gemeenskappe verrig, geplaas. Ons het met Alda Boer, ons Direkteur: Versorging, gesels oor die uitdagings en hoogtepunte van haar werk. 1. Hoe lank werk jy al as maatskaplike werker? Ek het in 1983 gegradueer en in 1988 ʼn M.Soc.Sc. by Kovsies voltooi. Ek het toe by Korrektiewe Dienste begin werk en daarna by die Christelike Maatskaplike Raad (CMR) Linden. Ek was ʼn rukkie uit die beroep om saam met twee ander persone ʼn administratiewe onderneming te begin en het daarna by NG Weltevreden begin werk. 2. Wat het jou laat besluit om n maatskaplike werker te word? Ek is deur en deur ʼn mens-mens en hierdie beroep is grootliks gerig op betrokkenheid by mense. Persoonlikheisdsevaluerings het my al dikwels as ʼn fixer bestempel en dalk het dit ook ʼn rol gespeel in my beroepskeuse. Ek het in ʼn huis grootgeword waar mense belangrik geag 4 WELTEWOORD I Maart 2018 is. My pa Carel, wat ʼn prokureur was, het altyd ander mense binne en buite sy beroep gehelp. My ma is almal wat haar leer ken se ouma. Diere was ook belangrik en niks is doodgemaak nie, net versigtig verwyder. 3. Wat is die grootste uitdagings van jou werk? Maatskaplike werk het baie uitdagings en ons moet dikwels in gevaarlike omstandighede werk en moeilike situasies en gedrag hanteer. Die deel wat my veral uitdaag is werk met kinders aangesien hul so afhanklik, ontvanklik en blootgestel is. Dikwels ontvang ʼn mens aanmeldings te laat en is die skade reeds groot. Die ander uitdaging is die armoede om ons. Ons gemeente staan bekend vir hulp na buite maar ons het natuurlik ook finansiële beperkings. My gebed is dan vir hulp om goeie onderskeidingsvermoë te hê want die nood is enorm. 4. Hoe lyk n tipiese dag in jou lewe as maatskaplike werker? My dag kan nooit honderd persent beplan word nie. Hoewel ʼn mens afsprake maak en vergaderings beplan, bly daar altyd die inloopafsprake en die onverwagse probleme wat ʼn hele dag se beplanning omver kan gooi. Tog is dit juis dít wat die werk vir my interessant maak. 5. Wat is die lekkerste deel van jou werk? Huweliksvoorbereidingskursusse en projekte waar ons ʼn verskil kan maak is altyd lekker, asook wanneer ʼn mens kan help met probleme en jy sien positiewe resultate. Dit is lekker om mense te sien groei en ontwikkel. Mense bring ook dikwels positiewe getuienisse uit hul lewens na die kantoor en as ek soms wonder oor die lewe kom verryk hul my met hul ervarings. Met hierdie werk kan jy vir seker nie in ʼn kokon leef nie en hoewel daar baie hartseer rondom my is beleef ek net soveel blydskap en omgee om my en waardeer ʼn mens baie dinge soveel meer in jou eie lewe. Vir meer inligting oor die dienste wat deur Alda gelewer word, besoek asb. ons webwerf by of kontak die kerkkantoor by

5 Huis Erasmus Ek en Willemien Botha het so drie jaar gelede betrokke begin raak by Huis Erasmus. Ons probeer om hulle tweeweekliks te besoek en vind dit baie verrykend. Die kinders is elke keer uit hulle velle om ons te sien en kruip diep in n mens se hart in. Daar is tans tien dogters tussen die ouderdomme van 11 en 18 met hulle huismoeder, Virginia. Ons besoek hulle met elke dogter se verjaarsdag en probeer ook om elke kwartaal n uitstappie te reël of iets spesiaals te doen. Ons het n Whatsappgroepie gestig met mense wat ons help met geskenke en toiletware vir die dogters. Met die afsluiting verlede jaar het ons n Kerspartytjie by hulle swembad gehou en wors gebraai, wat hulle baie geniet het. Hierdie jaar was daar al drie verjaarsdae. Die twee in Februarie het ons gekombineer met n Valentynspartytjie. Ons was onlangs weer daar en hierdie keer kon ons vir hulle heelwat kruideniersware neem wat uit verskillende bronne geskenk is. Ons is baie dankbaar vir die hulp van verskillende mense, waarsonder ons dit nie sou kon doen nie. As nog mense by ons wil aansluit, sal ons dit baie waardeer. Indien jy graag betrokke wil raak, kontak Marié by Marié du Toit Blou Huis Ons gemeente is aktief betrokke by die Blou Huis op die Maria Kloppers kampus van die Abraham Kriel kinderhuis. Verskeie gemeentelede en donateurs het onlangs gehelp met die opknapping van die huis. Ons sorg ook dat ons ten minste een keer per kwartaal met die kinders kuier. Ons het al ʼn bak-en-brou-dag gehad, ʼn uitstappie na ʼn hotel waar die kinders geleer het hoe om ʼn tafel mooi te dek en servette te vou, asook ʼn geleentheid om krale en oorbelle vir hulself te maak. In Desember 2017 was ons by Gold Reef City en vanjaar se spesiale uitstappie was na Sun City. Ons sê baie dankie aan al ons donateurs en vrywilligers en nooi enigeen uit om betrokke te raak by die Blou Huis. Kontak asb. vir Alda Boer by die kerkkantoor indien jy bereid is om te help. Marlene Ross Maart 2018 I WELTEWOORD 5

6 Ons lewe vir die stad Sowat n jaar gelede het MES ons Getuieniskommissie genader om betrokke te raak by hul kantien en sopkombuis in die middestad. Dankie aan almal wat betrokke is en sodoende n verskil maak in soveel mense se lewens! Dankie gemeente NG Weltevreden I want to go for drug rehabilitation; I am using drugs and want to stop. Dit is die opmerking van een jongman hier by die byeenkoms waar kos uitgedeel word. So is daar verhale wat oor die tyd vorm aangeneem het. Mense kom na die etes omdat hulle honger is, maar word dan blootgestel aan ander aktiwiteite waardeur hul lewens verander kan word. Met die daaglikse etes van Maandae tot Vrydae aan mense wat in haglike omstandighede meestal op straat leef, poog ons om die hoop en wete te skep dat hulle nie vergete is nie. Die wete word benadruk dat Jesus hulle liefhet en vir hulle sorg in ʼn wêreld waar dit lyk of die teendeel waar is. Jesus wys dit immers deur die bord kos wat daagliks verskaf word. By die MES Othandweni kantien word daar 10uur sop en brood bedien en dan weer een uur ʼn bord kos. Daar is die afgelope finansiële jaar etes by die kantien bedien (470 etes per maand) wat die sop en brood uitsluit. Hierdie gerusstelling en ondersteuning word moontlik gemaak deur die bydrae wat julle as gemeente aan ons maak. Baie dankie dat julle ons so getrou en met oop harte ondersteun! Sonder julle hulp sou hierdie diens aan arm mense onmoontlik wees. Groete namens die MES Uitreikbediening Pieter Bosch 20 Maart WELTEWOORD I Maart 2018

7 Ons het hierdie jaar besluit om sommer al vroeg in die jaar te begin saamkuier by die basaar! Na al die wonderlike reën die vorige aand het meeste gewonder of die basaar sou voortgaan. Maar ons is geseën met n ongelooflike lekker sonnige dag op Woensdag 21 Maart! n Rekordgetal mense het kom saamkuier en daar is gesmul aan al die heerlike pannekoek, kerrie en rys, braaivleis, poeding en vele meer. Ons dank die Here vir n rekord opbrengs van R wat gelewer is op die dag! Dit sluit in verkope op die dag asook donasies en skenkings. Baie dankie aan elkeen wat op n manier n bydrae gemaak het, ons waardeer dit ongelooflik baie! Besoek gerus ons Facebookblad vir meer fotos van die basaar! Maart 2018 I WELTEWOORD 7

8 Op Sondag 11 Februarie het S1 hul eerste CD bekendgestel by NG Weltevreden. Dit was n heerlike aand van praise & worship gewees! Indien jy nog jou CD wil bestel, kan jy vir Ds Ferreira Marais kontak by ferreira@s1worship.co.za of dit aanlyn bestel op hul webwerf NG Weltevreden beplan ʼn hele klomp opwindende dinge vir die volgende kwartaal. Dagboek asseblief solank die volgende datums en hou die afkondigings, brokkies en sosiale media dop vir meer inligting: 15 April Nagmaal in die kapel 19 April Twilight Trot Fun Run/Walk 27 April Mosambiek-uitreik 10 Mei Hemelvaart 13 Mei Moedersdag 14 Mei Pinkster 22 Mei Omgee-gholfdag 27 Mei Gesinsdienste 10 Junie Nagmaal in die kapel 17 Junie Vadersdag 20 Junie Projekte-aand met Kevin Leo 8 WELTEWOORD I Maart 2018 Grafies versorg en gedruk deur On Demand Design & Imaging I Dankie Maretha Gous vir die taalversorging.